GUTI ME NIYE WA

1. Wan wa ye ni gin acoya me cik ma con ki cik ma nyen (Buk 66) en keken aye obedo lok ma oa ki i dog Lubanga, ma roc mo pe iye, tye mu opong, ma romo, dok en aye tye ki twero me agiki pi niye ki kwo ducu (II Petero 1:20, 21; II Temceo 3:16, 17). 
2. Wa ye i Lubanga acel, ma rii labinaka, ma tye adek ikom acel: Lubanga Won, Lubanga Wod, Lubanga Cwiny ma Leng (Nwoyo Cik 6:4; II Korinti 13:14). 
3. Wa ye ni Lubanga ocweyo polo ki lobo labongo gin mo ma onongo tye con. Ocweyo i nino abicel keken kit macalo buk pa Acakki waco kwede (Acakki 1-3; Jon 1:1; Jo Kolocai 1:16-17; Jo Ibru 11:3). 
4. Wa ye ni Yecu Kricito ki nywalo pi tek pa Cwiny Maleng; niwok ki i kom nyako ma pe ongeyo laco mo; Yecu Kricito obedo i kin dano, en odeno can, remo ne ocwer, ci en oto; ki yike i lyel; ci ocer ki i kin jo muto; ci gitiŋe gitere woko malo i polo, ci ocako bedo piny ka ŋet Lubaŋa atena i kabedo me deyo yo tuŋ acucce; Yecu Kricito bako doge pi wa; dok en tye Lubanga ada dok bene tye dano ada (Luka 1:35; Luka 2:6, 7, 52; Matayo 27:29, 30, 35, 50; Luka 23:50-56; Tic Pa Lukwena 2:24, 33; I Jon 2:1; Jon 10:30; I Jon 4:2, 3). 
5. Wa ye ni Cwiny Maleng obedo Lubanga (Tic pa Lukwena 5:3, 4; Jon 14:16, 17; Jon 16:13). Wa ye ni tice tye me ilo Kricito malo, en pongo luyeyo, en miyo kero, dok poko mic me tic bot layeyo acel acel icawa ma en olare kwede, ento lanyut me mic pa Cwiny Maleng mogo ma gicoyo i Korinti me acel cura 12 obedo pi kare pa lukwena pa Yecu keken (Jo Ibru 2:3-4; Jo Epeco 2:20; 1 Korinti 13:8-13). 
6. Wa ye ni Lubanga ocweyo dano ducu i cale kikome; dano obalo ci okelo to me kom kacel ki to me cwiny; dok wa ye ni dano ducu ginwyalogi ki kit me bal, dok bene dano ducu balo i tam, i lok, ki i tic. (Acakki 1:26, 27; Jo Roma 3:22, 23; Jo Roma 5:12; Jo Epeco 2:1-3). 
7. Wa ye ni Yecu Kricito oto pi bal wa, ma lube ki gin acoya; dok jo ducu ma ngut dok ye i en ki kwanogi ni kit gi atir pi remone ma ocwer (I Korinti 5:3; I Petero 3:18; Jo Roma 3:24-26; Luka 13:3-5). 
8. Wa ye ni jo ducu ma gujolo Yecu Kricito pi niye nongo gunwale odoco pi teko pa Cwiny Maleng, dok gudoko lutino pa Lubanga; Cwiny Maleng bedo iigi macalo lanen ma Lubanga omwono i komgi, dok Cwiny Maleng gwokogi nio wa inino me koko dano (Jon 1:12; Jon 3:5; Jo Epeco 1:13). 
9. Wa ye ni Kanica pa jo muye obedo kom pa Kricito, obedo karibe pa luyeyo ducu, dok lumembane obedo jo ma gityeko lwongo gi woko ki i lobo me bedo i te loc ki twero pa Kricito ma en aye lawigi. Wa ye ni Kanica acel acel nongo obedo jo ma gu mine pigi kengi me bino kacel me woro Lubanga, me pwonye, ki me tic bot Lubanga (Jo Epeco 1:22, 23; I Korinti 12:12, 13; Tic pa Lukwena 13 & 14). 
10. Wa ye ni Yecu Kricito ociko pi jami aryo ma myero Kanica obed ka tiyo ne: Magi aye Cam pa Rwot wa me nipo pi tonne nio ka en bi dwogo; ki dong batisa ma ki luto dano i pii atye ka maleng me nyuto ni ngat ma oye i kom Yecu Kricito dong otyeko ribbe kwede i tonne, i yike, ki i nicer ne (I Korinti 11:23-26; Matayo 28:19, 20; Jo Roma 6:3, 4). 
11. Wa ye ni Yecu Kricito bi dwogo en kikome, dok ni jo muto gibicer woko. Wa ye ni Lubanga bingolo kop i kom dano ducu niwok ki i Yecu Kricito; dok bene en bimiyo bakacic me kwo ma pe tum i polo bot jo ma kitgi tye atir; ki jo ma kitgi pe atir ki bibologi i pwod ma pe gik i geena ((Tito 2:13; I Tecalonika 4:13-17; Niyabo. 19:11-16; Niyabo. 11-15; Niyabo 20:1-10; Jon 5:28, 29; Jon 14:1-3; Niyabo. 20:11-15). 
12. Wa ye ni Catan tye ada; dok en aye lubanga me loboni, en obedo lakwor pa Kricito ki Kanicane, ento agikine bibedo pwod ma pe gik (Jon 5:28, 29; Jon 14:1-3; Niyabo 20:11-15).